مين ابن المرة اللى قالك السوفت بخمسة جنية ؟

الزبون : سلام عليكوا
انت : وعليكم السلام ورحمة الله ...اؤمر يا يا باشا؟
الزبون : عايز اعرب الموبايل دةاصلة جايلى من ايطاليا ومفيهوش عربى
انت : بعد ما تشوف الجهاز ( والموديل والفيرجن والحركات دى) حاضر
تعريب الجهاز دة هيتكلف 50 جنية ( 50 جنية رقم تشبيهى مش مقياس للسعر)
الزبون : يبصلك بصة (متفهمش معناها بالظبط ) المهم مش حلوة ويقولك 

دا السوفت ب5 جنية عند كل الناس 
انت : على فكرة حضرتك معاك جهاز سعرة اكتر من 1300
 جنية فإزاى سوفتة ب 5 جنية؟
ولو حتى الجهاز سعرة 100 جنية فعمر سعر السوفت ما هيكون 5 جنية !
بعد الكلمتين دول بيبقا فى اختيارين ..يا اما تقولة: 
خلى اللى قالك 5 جنية يعملهولك ( ودة الاسهل )
يا اما تفضل تقنع فية بالعقل وازاى ان مفيش حاجة بالسعر دة وان البوكسات غالية وكل يوم فى جديد
وان الموضوع مرهق سواء فى تحميل فلاشات او سرعة نت او اشتراكات نت برضو .
بس طبعا هو مش فى دماغة الهرى دة كلة ولا انك بتخسر او بتكسب هو يهمة السعر بس.
أكيد الموضوع دة لحد انهاردة بيتكرر مع ناس كتير شغالين فى السوفت وير
والموضوع دة قديم ونتيجة تراكمات واسباب كتير هنتكلم فيها مع بعض فى اكتر من موضوع 
لكن المهم انة بيتكرر لحد انهاردة ودة معناة ان لسة 
نظرة معظم الناس للسوفت وير 
بتبقا نتيجة انة سمع من فلان او المحل الفلانى باعلة جهاز وعايز يخلص منة فيقولة 
روح لفلان وخلية ينزلك سوفت واديلة 5 جنية 
طب اية الاسباب اللى خلت نظرة الناس لعمليات السوفت وير عموما
 ( سواء تعريب ,فك شفرة,ربير,إلخ)
بالطريقة دى


السبب الاول : دخلاء المجال والفهلوى بتاع كلة

دخيل المهنة

دة اللى دخل المجال عشان عايز يعمل سبوبة وقرشين ويقلب
مش فارق معاة يعمل شغل تمام او يتعلم بجد
 ويعمل فلوس حلال والشخص دة تلاقية 
بيشتغل الناس اكتر ما بيركز انة يتعلم وتلاقية يعرف معلومة من هنا على حركة من هنا 
ويدخل ريكفرى ويعمل Wipe ويفك النمط او يفلش جهاز على الOdin 
 وخلصانة يا معلم
ودة نوع مزاجى مش محترف فى شغلة يعنى ممكن يعمل حاجة ويموت فى سعرها 
او يعمل حاجة ويرفع الزبون قوى فى السعر .لانة متعلمش كويس ووصل للمرحلة اللى تخلية
يحكم على الجهاز اللى داخلة كويس (هيعمل فية اية وهياخد داتا اية وكمان هياخد وقت قد اية

الفهلوى بتاع كلة : 

 ودة بقا لسة مش وصلة ان الدنيا اتغيرت وان مجال صيانة المحمول عموما فى الفترة الاخيرة
اتغير تغيير كلى وجزئى عن زمان 
زمان الاجهزة كانت قليلة واغلبها نوكيا واعطال معروفة وكان السوفت على الديجان وبعدها ظهر التويستر والبور فلاش

فساعتها كان ممكن تشتغل فى السوفت والهارد عادى .لكن دلوقتى بقا فى تخصص اكتر يعنى بقا فى سوفت لوحدة
وهارد لوحدة وكمان الموضوع اتفرع اكتر>
 السوفت بقا لية اشكال كتير ( اندرويد,IOS,ويندوز فون,إلخ)
والهارد كمان اشكالة اختلفت عن زمان وبقا فى تخصص اكتر ..لانك لما تتخصص فى حاجة بتحبها
وتتقنها هتتميز فيها وتوصل بمجهودك للى انت عايزة
فاخينا الفهلوى بقا لسة مصمم انة بيشتغل كلة ..(- انت ممكن تشتغل كلة فعلا بس عمرك ما هتكون متميز فى الاتنين-)
وعلى فكرة فى الاغلب اللى بيعمل كدة بيكون شغال فى الاصل هارد(محدش يزعل ) لانة متعود ان السوفت عادى بالنسبالة 
مع انة غلطان والايام والشغل والتحديثات دايما بتثبتلة العكس ..
دخيل المهنة والفهلوى بتاع كلة من المؤكد هيلبسوا فى الحيط لان كل يوم الحماية بتزيد على اجهزة المحمول سواء على الجزء 
المتعلق بالسوفت او اجزاء وقطع الهارد وير على بورد الاجهزة ودة بقا تستناة فى المحطةلما يجيلك ..هاهاهاها

السبب التانى : محلات و منافذ البيع 

فى محلات كتير معندهاش صيانة ولا سوفت وير وبتعتمد اكتر على بيع الاجهزة
سواء جديد او مستعمل وطبعا الناس اللى شغالة فى المحلات دى يهمها انها تبيع وخلاص
يعنى لو دخلة جهاز انجليزي او علية شفرة ممكن يموت فى تمنة ويشترية
 ودة موضوع يخصة
لكن المشكلة بقا انة ممكن يبيع الجهاز الانجليزى لاى زبون يدخلة ويفضل يقنعة بية
ويقولة هو بس محتاج يتعرب روح لاى محل بتاع سوفت وير 
وهو هيعملهولك
وانت واقف معاة 
الزبون بقا يسألة : طب اديلة كام يا استاذ؟
يرد عم العبقرى يقولة : اديلة 10 جنية او 15 جنية اخرة
طبعا الشخص اللى بيعمل كدة وفاكر انة بيخلص مصلحتة وخلاص
 وعايز يبيع ميعرفش 
ان الزيون هيروح يسأل وهيرجعلة تانى ( دا اذا معملش معاة مشكلة ) وفى الاخر بيسيب تأثير سلبى
للزبون عن المهنة وعن اللى شغالين فيها عموما من تعاملة وكدبة وعدم جديتة

السبب التالت : فنيين الهارد وير 

طبعا احنا بنتكلم عن فئة معينة من الناس اللى شغالة هارد لان فى كتير جدأ من الفنيين بيتعاملوا باحترافية 
مع الزباين وعارف هو بيعمل اية 
لكن الفئة التانية  اللى احنا بنتكلم عليها دى بتعمل مشاكل كتير
 لفنيين السوفت وير 
لانة مثلا ممكن يعمل جهاز هارد ويكون الجهاز بعدها عايز يتفرمت او علية رمز 
وييجى يسلم الجهاز للزبون ويحاسبة على العطل اللى عملة ويقولة
 فى كمان 10 جنية سوفت وير 
وطبعا الزبون بيدفع .بس بتثبت فى دماغة ان الراجل دة عملة سوفت وإن اى سوفت ب10 جنية
وإن اى حد تانى هيفكر يقولة اكتر من 10 او 15 جنية يبقا نصاب 
واحنا بنقول للفنيين اللى بتعمل كدة اتقى الله
 لانك مبتصرفش بوكسات وكابلات واكتفيجن وحركات 
زى الراجل بتاع السوفت
-عايز اشترى بوكسات سوفت وير ومحتار. تنصحونى أشترى اية ؟ الجزء الاول
 يعنى لو عايز تكسب ومالة دة حقك
 بس مش تخسر ناس تانية بكلامك
وتقول اى اسعار وخلاص عشان تمشى الزبون وعشان كمان انت معملتش حاجة فى الجهاز 
ولو الكلام مجبش معاة فايدة ..سيبة هو الخسران 
لانة برضو من نفس فئة الدخيل والفهلوى اللى اتكلمنا 
عليهم فوق وكدة كدة مسيرة هيلف يلف ويجيلك وساعتها هيتعمل معاة الجلاشة ..هاهاهاهاها




خلاصة المقال:

إحنا ذكرنا بعض الاسباب مش كلها اللى وصلت المجال للمرحلة دى 
واكيد فى حاجات تانية كتير ممكن تشاركونا بيها 
وسواء كنت فنى سوفت وير او هارد وير خليك دايما متميز وصادق مع الناس
لان الزباين دلوقتى بقت بتفهم الصادق من اللى بيحور ويقول اى كلام 
عشان متكونش سبب فى ضرر لنفسك وضررللى حواليك