شروح وتفاصيل مهمه عن تفعيل حسابات Paypal سحب الاموال داخل مصر

 

هقولكوا على تجاربى الشخصية مع البنوك الاليكترونية ومواقع العمل الحر علشان تعم الفائدة ومحدش يقع فى الاخطاء اللى انا وقعت فيها قبل كدة لان فى اخطاء منها كلفتنى كتير .
== إستقبال الاموال من بيبال داخل مصر ==
وخلينا فى البوست دة نتكلم عن تفاصيل وطرق سحب الاموال من موقع Paypal داخل مصر
وانا هقولكوا على الطرق اللى جربتها ونجحت معايا وكمان هقولكوا على شوية تفاصيل مهمه جدأ فى اخر المقال
وعلشان نسهل الموضوع شوية .. فخلينا نقسمه على نقط متتالية
1 - انت تقدر تفتح حساب بيبال من داخل مصر بدون اى مشاكل بس" لازم لازم لازم " تسجل الحساب بمعلوماتك الشخصية الحقيقية لان Paypal  عندة قوانين صارمه وممكن حسابك يتقفل فى اى وانا اتقفلى حساب كنت شغال علية من سنين بسبب الموضوع دة
ودة رابط الموقع : https://www.paypal.com/ وتقدر تدخل وتسجل علية حساب جديد بطريقة عادية
2 - بعد ما تفتح الحساب الجديد بمعلوماتك ورقم موبايلك لازم تفعله من الرساله اللى هتوصلك على الايميل
3 - بعد فتح الحساب وتفعيله هتقدر دلوقتى تستقبل اى مبالغ مالية .. لكن وركز فى لكن دى .
الحساب هيكون تحت المراجعه والمراقبة يعنى لو استلمت اى مبلغ مالى .. فالموقع هيطلب منك معلومات عن التحويل وعلاقتك مع المرسل ولية انت بتستلم الفلوس دى منه .. وانت هتكتبله السبب يعنى دى فلوس شغل اون لاين مثلا سواء شغل خاص بيك او على مواقع العمل الحر زى اب ورك او اى موقع تانى ... والافضل انك ترفعله اى اثبات زى مثلا سكرين شوت من الايميل اللى بينك وبين العميل اوصورة  من محادثة واتس اب او اى اثبات تانى 
وهتوصلك رساله على الايميل بإن بياناتك قيد المراجعه


وفى خلال 48 ساعه هتوصلك رساله تانية برفع القيود عن الحساب 

ومتقلقش لان الموضوع دة ممكن يحصل معاك فى اول مرة تستقبل فيها اى فلوس على الحساب ... ودة علشان الموقع يتأكد من عملية التحويل ونشاط الحساب وعدم وجود اى انتهاكات
4 - بعد ما فتحنا الحساب وفعلناة وكله تمام نيجى للخطوة اللى بعد كدة
وهى ربط بطاقة او حساب بنكى بحسابنا على بيبال علشان نقدر نحول الفلوس ونسحبها من داخل مصر 


وانا هقولكوا على الطرق اللى انا جربتها شخصيأ ونجحت معايا 
لان Paypal مش بيقبل كل البطاقات والحسابات البنكية خصوصأ من داخل مصر
واول طريقة : واول بطاقة بتقبل الربط مع بيبال من داخل مصر هى بطاقة البريد المصرى سواء بطاقة " ايزى باى " او بطاقة " يلا باى " وحاليا بطاقة ايزى باى معدتش بتنزل كتير والموجودة والمتاحه حاليا هى بطاقة يلا باى
وانت هتروح اى فرع بريد فى بلدك وتسأل عن بطاقة ايزى باى ولو مش موجودة يبقى هتسأل عن يلا باى ... وهتشترى بطاقة وسعرها حوالى من 30 ل 50 جنية بالكتير .. ولازم بعدها تتصل على خدمه العملاء وتفعل البطاقة من خلالهم وبعد ما تفعلها هتشحنها ب 150 او 200 جنية مثلا علشان لما تربطها بيبال هيخصم منها حوالى 1 او 1 ونص دولار علشان يتحقق منها ويبعتلك رقم التفعيل " Pin Code "
 وبعدها هيجعهم تانى فى حسابك
ولما تربط البطاقة بحساب بيبال هيطلب منك رقم البين كود المكون من 4 ارقام .. وانت هتتصل بخدمه العملاء للبريد المصرى وتطلب منهم الكود اللى وصل على حسابك ... والموظف هيديهولك وبعدها هترجع لموقع بيبال وتكتب الكود ... وكدة تمام وتم ربط البطاقة بنجاح على حسابك وتقدر تحول عليها اى فلوس توصلك على الحساب وتسحبها من اى ماكينه صراف الى داخل مصر ...
 ودى اول طريقة ناجحه جربتها
- نروح للطريقة التانية : وهى ربط بطاقة بنك مصر .. وبرضو بتنفذ نفس الخطوات اللى قولنا عليها لربط البطاقة وتتصل بخدمه العملاء وتفعلها بالبين كود اللى وصل على حسابك .
ودول الطرقتين اللى انا جربتهم ونجحوا معايا ولو عندكوا طرق تانية ناجحه لبنوك او بطاقات تانية بتقبل الربط من داخل مصر ..
قولولى عليها فى التعليقات
- ودلوقتى تقدر تربط اى بطاقة منهم بحسابك على بيبال وتحول عليها الفلوس وتسحبها من اى ماكينه

== ملاحظات وتفاصيل مهمه عن سعر الصرف وعموله التحويل من Paypal  داخل مصر ==
وخلونى دلوقتى اقولكوا على ملاحظه ومعلومات مهمه هتحتاجوا تعرفوها قبل ما تسحبوا اى مبالغ مالية من بيبال Paypal من داخل مصر
وعلشان اوضحلكوا الموضوع اكتر فخلونى اعملكوا مقارنه بسيطه بين عمله التحويل وسعر الصرف 
بين بطاقة البريد المصرى وبطاقة بنك مصر او بطاقة اى بنك تانى
- لو هتحول الفلوس على بطاقة البريد المصرى فموقع بيبال هو اللى بيحدد كل حاجة وخلونى اديكوا مثال 

لو عايز تحول 100 دولار على البطاقة فسعر الصرف موقع بيبال هو اللى بيحددة .. يعنى هو اللى بيحسب قيمه الدولار مقابل الجنية وغالبا سعر الموقع بيكون اقل من السعر العادى يعنى لو الدولار بيتحسب ب 30 او 31 ممكن الموقع يحسبة ب 29 او اقل
وبعد ما بيحولك سعر الصرف من الدولار للجنية المصرى بيرجع يخصم حوالى 80 جنية ودى عموله تحويل ثابته وبيتم خصمها على كل عملية تحويل هتتم على البطاقة .. وبعدها بيحولك باقى المبلغ على البطاقة
- لكن لو هتحول الفلوس على حساب بنكى او بطاقة بنكية زى بطاقة بنك مصر مثلا
فالموقع دورة هنا انه فقط بيحول المبلغ زى ماهو بنفس العملية بعد ما بيخصم منه عمله التحويل
وبرضو خلينى اديلك مثال اوضحلك بية الفكرة 

لو انت استقبلت 200 دولار مثلا على حسابك على بيبال وعايز تحولهم على بطاقة بنك مصر او على حساب بنكى ... فموقع بيبال بيخصم 5 دولار عموله تحويل ثابته عن كل عملية تحويل هتعملها ... وبعدها بيحول ال 195 دولار زى ما هما لحسابك البنكى بنفس العمله سواء كانت دولار او يورو وبعدها البنك هو اللى بيتكفل بتحديد سعر الصرف وقيمه الجنية قدام الدولار او اليورو بناء على سعر صرف البنك نفسه واللى غالبأ بيكون اعلى من سعر موقع بيبال
وبالتالى لو انت جايلك مبلغ كبير وعايز تسحبه .. فتقدر قبلها تحسب مصاريف التحويل وسعر الصرف لكل طريقة من الطرق اللى قولنا عليها وبعدها انت تحدد الانسب ليك والارخص فى المصاريف والعموله ..
وبس كدة
ومعلش طولت عليكوا .. بس فى تفاصيل مهمه لازم نقولها لان ممكن شباب كتير تحتاجها لو عايزين يشتغلوا اون لاين ويستخدموا بيبال كوسيله دفع من خارج مصر ويستقبلوا منه فلوس داخل مصر .
سلام .

تعليقات



حجم الخط
+
16
-
تباعد السطور
+
2
-