بتعمل إية لما الشغل بيريح .!؟


كالعادة مع دخول فصل الشتاء وبدء الدراسه وبداية موسم الركود فى كل المجالات سواء بيع او شراء 
او المجالات المهنية والحرفية
لكل الناس اللى شغالة وطبعأ زيادة المشاكل الاقتصادية للبلد بتكون عامل فعال فى زيادة عملية الركود وقله الشغل .
ودايما بنلاحظ إن الشغل بيقل تدريجيأ مع دخول موسم المدارس والشتاء من كل سنه .
وطبعأ فنيين السوفت وير والسوفتجية ..وفنيين الهارد وير واغلب اللى شغالين فى مجال المحمول 
بيعانوا من قله الشغل
وضعف الطلب على البيع والشراء فى الشهور دى .


وبعد ما كان بيدخلك 10 او 20 جهاز " كمثال " فى اليوم عايزين صيانه سواء سوفت وير او هارد وير
بقا بيدخلك جهاز او اتنين بالكتير بسبب الركود زى ما قولنا 
وكمان بسبب الناس الفهلوية  اللى دخلت المجال فجأه وبقت بتضرب فى الاسعار بدون وعى او فهم
وكنا إتكلمنا عن الناس دى فى أكتر من تدوينه منفصله 
واللى بسببهم ممكن تقابل بعض المشاكل مع الزباين زى الاسعار اللى إنضربت او سمعه الشغلانه اللى قلت قوى فى الفترات اللى فاتت بسبب " الفهلوة " والنصب على الناس بطرق ملتوية ومختلفه .
وعندنا امثله كتير جدأ لناس بتفرمت الموبايلات وبيقولوا إحنا عملنا سوفت وبعدها بيوم بيرجع العطل تانى .
وفنيين هارد وير ممكن مش يراعوا ربنا فى شغلهم ويغيروا بورد الاجهزة .او قطع أصلية بقطع صينى
وطبعأ دى فئه منتشرة للاسف وبتزيد كمان فى الوقت الحالى لانهم فاكرين إن دى شطارة ومهارة 
وميعرفوش إنهم بكدة بيضروا نفسهم وبيضروا باقى الفنيين معاهم بسبب المشاكل اللى بيعملوها مع الزباين .
وبالتالى العميل بيخرج وهو عندة إنطباع سلبى عن كل الفنيين اللى شغالين فى المجال .
ودى بعض المشاكل اللى ممكن تقابل كل فنيين المحمول فى شغلهم .
لكن النهارد عايزين نتكلم وندردش فى موضوع تانى وطريقة التعامل معاة بتختلف من واحد للتانى .
وهو موضوع قله الشغل فى بعض فترات السنه من كل عام 
وإزاى فنيين المحمول بيتعاملوا مع الفترة دى سواء فنيين السوفت وير او الهارد وير على حد سواء
وهنحاول نقدم اكتر من مثال لطريقة التعامل مع فترات ركود الشغل وإزاى الفنيين بتعاملوا معاها
1 - الفنى " المحترف "

- واول مثال معانا للفنيين اللى بيقضوا الفترة دى فى زيادة مهارتهم فى المجال المتخصصين فية 
سواء كان مجال السوفت وير او الهارد وير .. واللى بيحاولوا يستغلوا وقت فراغهم فى البحث عن مهارات واساليب
تساعدهم فى شغلهم وتنمى من مهاراتهم وحرفيتهم 
زى الدخول المستمر للمواقع والمنتديات التقنية والخاصة بفنيين السوفت وير
ومشاهدة احدث المواضيع والتركات والحلول للموديلات والاجهزة الحديثة وطرق التعامل معاها بحرفية
ومحاوله تعلم الجديد فى عالم المحمول والتعرف على الحمايات الحديثة للاجهزة
وطرق التعامل معاها ومشاهدة تجارب ناجحه لطرق حل مشكلات السوفت وير الجديدة 
سواء على المنتديات او المواقع او حتى مواقع التواصل الاجتماعى زى صفحات وجروبات الفيس بوك 
او حتى جروبات واتس اب وغيرها من مواقع التواصل الاجتماعى
وكمان تحميل أحدث الفلاشات والملفات الجديدة اول باول وحفظها على جهازك 
علشان لما الدنيا تشتغل تكون مأمن نفسك وعندك ملفات وفلاشات حديثه موجودة على جهازك
واللى هتوفر عليك وقت ومجهود كتير فيما بعد .
ونفس الحال ينطبق على فنيين الهارد وير اللى ممكن يستغلوا وقت الفراغ فى الممارسه 
وطرق إكتشاف الاعطال والتجربه على بورد قديمه .. او التعود على العمل بالمكواة والهوت اير للفنيين المبتدئين .
ودايما الفنى المحترف بيعرف يستغل الفترات دى افضل إستغلال لمصلحته
وزيادة خبراته ومهاراته فى مجال صيانه المحمول .
2 - الفنى"  الجيمر "

- وطبعا انا واحد من الناس اللى ملحدين Games سواء على الموبايل او الكمبيوتر ..لكن اوقات ممكن اجرب لعبة
من باب التغيير او كسر الملل ..لكن فى شباب كتير فى مجالنا مدمنين العاب بإختلافها
سواء على الكمبيوتر او على الموبايل زى العاب PES او PUBG وغيرها كتير .
والفئه دى من الفنيين بيقدروا بسهوله إنهم يقضوا الفراغ اللى ممكن تسيبه ترييحه الشغل 
وحتى لو عندة شغل كتير بيقدر يوفر وقت علشان يلعب Games واللى فى اوقات كتير ممكن الالعاب تعطله عن شغله
لانه أدمن الالعاب وبيحب يعيش معاها وبيحس بمتعه وهو بيلعب ومبيحسش بالوقت اللى بيضيع منه .
وطبعا الفنيين اللى من النوع دة اغلب وقتهم بيقضوة فى اللعب سواء عندة شغل او معندوش 
وبالتالى إستفادته بتكون قليله جدأ من وقت فراغه ومبيعرفش يتابع الجديد باستمرار 
وبيشتغل وخلاص ولو جاله عطل جديد علية بيرجع يبحث من الاول على الانترنت وبياخد وقت طويل 
علشان يقدر يوصل لحل المشكله لانه شغال اول باول زى ما بيقولوا ... ومحاولش يعمل قاعدة بيانات لشغله
ويبحث عن الاعطال والمشاكل الجديدة ويحفظها عندة علشان توفر علية البحث والجهد .لما يجيله عطل مش عارفه .
وغالبأ بعد ما يسلم الجهاز للعميل سواء حل المشكلة اولا ... بيرجع تانى لهوايته المحببه وينغمس فيها
ويخرج برة عالم الشغل ويدخل عالم ال PUBG وميخرجش منه إلا وهو مروح بالليل .
3 - الفنى " الشقيط

ودة الفنى اللى بيقضى وقت الفراغ وترييحه الشغل فى " شقط بنات " على مواقع التواصل الاجتماعى بإختلافها
زى فيس بوك وواتس اب وفايبر وغيرها من مواقع التواصل .
واغلب الوقت هتلاقية مبيسبش موبايله وراشق دايما فى اى جروب او صفحه طريه فيها حريم
وعادة هتلاقي الهاند فرى مبيفارقش ودانه .
وممكن تاخد وقت علشان تلفت انتباهه او تنادى علية ويسمعك لانه بيكون منغمس فى الرد والكتابه
او مشاهدة فيديوهات على Tik Tok او صور على إنستجرام
وطبعا مش محتاجه انى اقولكوا الفنى اللى من النوعية دى بيضيع وقت قد إية على مواقع التواصل 
وعلى فكرة مش عيب انك تدخل مواقع التواصل بإستمرار وتكون دايما اون لاين علشان تتابع جروبات الشغل
او صفحات مهنية تقدر تستفيد منها .. لكن المشكله فى الوقت اللى بيضيع فى الهوا ومبتستفدش منه اى حاجة
وتفضل طول اليوم تتابع بنات او تكلمهم او تبعتلهم طلبات صداقه 
وفى الاخر كل القصص والاضافات والحكاوى والحركات بتنتهى ب " بلوك " جميل ولطيف .
وترجع تانى من نقطه البداية .. وتبحث عن بنات وجروبات ... وحفله تانية وتذاكر تانية .
خاتمه الموضوع
- دى بعض الانواع والحالات لبعض فنيين السوفت وير وطريقة تعاملهم مع فترات ركود الشغل 
وإزاى بيقدروا يستغلوا وقت فراغهم سواء بالسب او بالايجاب 
وطبعأ مش كل الفنيين بتندرج تحت نوع واحد من اللى قولنا عليهم لكن بتختلف الطرق والاساليب
ولو إنت شايف نفسك من الانواع اللى قولنا عليها ياريت تقولنا رأيك .
ولو عندك تجربة مختلفه مع طريقة التعامل مع وقت الفراغ وترييحه الشغل ياريت تقولهالنا فى التعليقات
ومتنساش تشترك معانا فى قناة جوكر سوفت وهتلاقيها على يسار الصفحه 
علشان توصلك كل الفيديوهات والشروحات الجديدة لعمليات ومشاكل السوفت وير 
وأشوفكوا بقا فى ساحه المعركه على PUBG ..هاهاها ... سلام
تعليقات



حجم الخط
+
16
-
تباعد السطور
+
2
-